Ihuriro ry’abagore bikorera ryahaye amakoperative atishoboye imashini zo kudoda zigezweho

Kuwa 8 Werurwe 2017 ubwo hizihizwaga umunsi mpuzamahanga w’abagore, nibwo iri huriro rifatanyije na sosiyete y’itumanaho ya MTN Rwanda n’Ikigo cy’Ubwishingizi cya Radiant, bashyikirije izi mashini ku makoperative abiri y’abagore batunzwe n’umwuga w’ubudozi.

Amakoperative yafashijwe ni ‘Tinyuka mudozi urashoboye’ igizwe n’abantu 12 n’iyitwa ‘Turimbe’ irimo abantu 19.

Umuyobozi mu Ihuriro ry’Abagore bikorera, Agnes Samputu, yabwiye IGIHE ko bahisemo gufasha aya makoperative y’ubudozi bitewe n’uko basanze imashini bari bafite zishaje, zitanagezweho nyamara bafite ubushake bwo gukora kugira ngo biteze imbere.

Yagize “Twahisemo kubafasha kuko ubusanzwe inshingano y’ihuriro ryacu ari ugushakira amahugurwa no kubakorera ubuvugizi, ni nayo mpamvu twegereye MTN na Radiant kugira ngo babafashe nabo biteze imbere, cyane ko bari baranigomwe bafata umwanya bajya gushora imari mu ishuri ryo kudoda kugira ngo barusheho kunoza umurimo wabo.”

Yashimiye MTN Rwanda na Radiant byatanze inkunga kugira izo mashini ziboneke. Sosiyete y’itumanaho yaguze imashini umunani za miliyoni eshatu, naho iy’ubwishingizi igura enye.

Umuyobozi wa Radiant, Tuhairwe Kamanzi Ovia, yasobanuye ko batanze iyo nkunga kuko Radiant ifata abagore nk’inkingi y’iterambere.

Ati “Turifuza ko imashini bazazikoresha neza bagatera imbere bubaka n’imiryango yabo.”

Yanibukije aya makoperative gufatira izo mashini bahawe ubwishingizi kugira ngo izigize ikibazo zikoreshwe.

Umuyobozi wa Koperative ya Tinyuka Mudozi, Uwimana Fatuma, yashimiye iyo nkunga bahawe.

Yagize ati “Turishimye cyane kuko tugiye kwiteza imbere vuba mu buryo bugaragarira buri wese, cyane ko mbere twakoreshaga imashini zitwa ’nyonganyonga’ ku buryo byanadusabaga gufata urugendo rwo kujya gukoresha ahandi hantu hari inziza. Ariko kuba ubu tubonye izigendanye n’igihe, turizera ko tugiye kwiteza imbere cyane.”

Aya makoperative yashimiye Ihuriro ry’abagore bikorera ryabashakishirije inkunga, anasaba ko ryazakomeza no kubashakira amahugurwa kugira ngo barusheho kwiteza imbere.

 

MTN Rwanda ishyikiriza abagore inkunga yo kugura imashini zigezweho

 

Radiant ishyikiriza abagore inkunga yabateye

 

Perezida w’Ihuriro ry’Abagore bikorera, Eugenie Mushimiyimana

 

Umuyobozi wa Koperative Tinyuka Mudozi, Uwimana Fatuma

 

Umuyobozi mu Ihuriro ry’Abagore bikorera, Agnes Samputu atangaza ko bafashe icyemezo cyo gushyigikira aya makoperative y’ubudozi nyuma yo kubona ubushake bafite

 

Umuyobozi wa Radiant, Tuhairwe Ovia

 



Leave a Reply